ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានចេញរបាយការណ៍ស្តីពី លទ្ធផលក្រុមការងារបង្ក្រាបបទល្មើសជលផល នៅបឹងទន្លេសាប នាថ្ងៃទី២៦ ខែកុម្ភៈ ឆ្នាំ២០២៤។

របាយការណ៍នៃលទ្ធផលបង្ក្រាបបទល្មើសជលផល នៅបឹងទន្លេសាប បានឱ្យដឹងថា សមត្ថកិច្ចខណ្ឌរដ្ឋបាលជលផល ចុះត្រួតពិនិត្យ និងបង្ក្រាបបទល្មើសជលផល ចាប់ពីថ្ងៃទី២៣ ខែមីនា ឆ្នាំ២០២២-២៦ ខែកុម្ភៈ ឆ្នាំ២០២៤ បង្ក្រាបបានបទល្មើសឧបករណ៍អួនអូសទឹកសាប ៥៣វង់ ម៉ាញ់ ១៤វង់ ឆក់ត្រជាក់ និងក្តៅ ១ ៤៧៣គ្រឿង ឈិបយន្ត ២៣គ្រឿង អួនហ៊ុម ៣៣វង់ របាំងស្បៃមុង និងសាច់អួន ១ ៦៥០ ៦១៧ម៉ែត្រ លូ និងលប ១៥ ២២៩មាត់ បង្គោលចម្រឹង ៧៦៨ ២១១ដើម ឈ្នក់រួមផ្សំភ្លើង ១១៩វង់ កាណូត ១៧៦គ្រឿង ម៉ាស៊ីន ៨៤គ្រឿង បញ្ជូនសំណុំរឿងទៅតុលាការ ៧១ករណី ចេញដីកាកោះ ២០នាក់ និងឃុំខ្លួន ៣១នាក់ ក្នុងខេត្តចំនួន៥ គឺ ខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តសៀមរាប ខេត្តកំពង់ធំ និងខេត្តបន្ទាយមានជ័យ។

របាយការណ៍ដដែលបានឱ្យដឹងទៀតថា ក្រសួងទទួលបានព័ត៌មានពាក់ព័ន្ធនឹងបទល្មើសជលផល គិតចាប់ពីថ្ងៃទី២៣ ខែមីនា ឆ្នាំ២០២២-២៦ ខែកុម្ភៈ ឆ្នាំ២០២៤ លេខាធិការដ្ឋានបានទទួលព័ត៌មានពីប្រជាពលរដ្ឋ និងសារព័ត៌មានចំនួន ១៥លើក។

ក្រសួងកសិកម្ម រុក្ខាប្រមាញ់ និងនេសាទ បញ្ចាក់ថា រាល់ការទទួលបានព័ត៌មាន លេខាធិការដ្ឋានតែងតែធ្វើការបកស្រាយបំភ្លឺ និងយកព័ត៌មានទាំងនោះ ទៅឱ្យក្រុមប្រតិបត្តិការធ្វើការស្រាវជ្រាវ ទប់ស្កាត់ និងបង្ក្រាបជាបន្តបន្ទាប់៕